2 Keunenks 08
01Elisa haar vraauw van dij hai t kind weer leventeg moakt haar, aanroaden: "Ie mouten votgoan en mit joen hoesholden veur n zetje aans woaraarns wonen goan, t dut nait òf woar. Want de HEER let n hongersnood kommen dij in dit kontraain vervaast zeuven joar duren zel."
02Vraauw haar doan zo as godsman heur zegd haar. Ze was mit heur volk votgoan en ze haren zeuven joar as vremden touholden in t laand van Filistijnen.
03Dou ze noa dij zeuven joar in heur aigen laand weeromkwam, ging ze noar keunenk tou mit t oog op heur hoes en heur grond.
04Dou wol t gevaal dat keunenk krekt aan proat was mit Elisa zien knecht Gechazi. "Vertel mie toch ais wat over aal dij biezundere dingen dij Elisa doan het," vruig e.
05En mit dat Gechazi keunenk vertelde hou of Elisa n dode leventeg moakt haar, loat moeke van t kind dat e weer leventeg moakt haar der nou net nait aankommen om keunenk om hulp te vroagen. "Meneer de keunenk," zee Gechazi, "dit is dij vraauw doar ik t over haar en doar is t jonkje ook dij Elisa leventeg moakt het."
06Keunenk vruig vraauw der noar en zai vertelde hom t. Keunenk gaf heur dou ain van t hòf mit. "Zörg der veur," zee e, "dat ze aal wat ze haar weer krigt en ook aal wat heur laand opbrocht het van dag òf dat ze tou t laand oetgoan is, aan nou tou."
07Elisa kwam ais in Damascus, net dou keunenk Benhadad van Aram zaik was. Ze vertelden keunenk: "Godsman is hierhèn kommen."
08Keunenk zee tegen Hazaël: "Goa godsman mit n geschenk in muit en vroag hom of hai bie de HEER te roade goan wil of ik van dizze zaikte weer beter wor of nait."
09Mit vatteg kemélen, belast en beloaden mit alderhande kostboare zoaken oet Damascus, ging Hazaël Elisa in muit. Hai kwam bie godsman en zee: "Keunenk Benhadad van Aram stuurt mie noar joe, zien roadgever, tou om te vroagen of hai van zien zaikte beter worden zel of nait."
10 "Ie kinnen tegen hom zeggen, dat e wizzenzeker beter wordt," zee Elisa. "Mor de HEER het mie waiten loaten, dat keunenk zekerwoar staarven zel!"
11 Godsman huil zien gezicht in plooi en bleef stief veur zok oet kieken, op t onfersounleke òf. Den begunt e inainen te hoelen.
12 "Meneer, woarom schraif ie?" vruig Hazaël. Elisa zee: "Omdat ik wait wat veur ellèn ie Isrelieten aandoun zellen. Heur vestings zel ie platbranden, heur jongkerels mit t sweerd doodsteken, heur lutje kinder kop inhaauwen en vraauwlu dij n lutje verwachten, zel ie t lief opensnieden."
13 "Mor, meneer," kwam Hazaël doar tegenin, "hou zol zo'n man van niks as ik tot zokse grode doaden in stoat wezen?" Mor Elisa zee: "De HEER het mie zain loaten dat ie keunenk van Aram wezen zellen."
14 Hazaël ging weerom noar zien heer. "En, wat zee Elisa?" vruig keunenk. "Hai vertelde mie," zee Hazaël, "dat ie wizzenzeker beter worden!"
15 Mor aanderdoags gebeurde der dit: Hazaël pakte n deken, muik dij nat en drokte hom keunenk in t gezicht, van dij gevolgen dat e stikte. En Hazaël wordt keunenk in zien stee.
16 In t viefde joar dat keunenk Joram, Achab zien zeun, over Israël regaaierde - Josafat was dou keunenk van Juda - wer Joram, Josafat zien zeun, keunenk van Juda.
17 Twijendatteg joar was e dou e keunenk wer en hai regaaierde aacht joar in Jeruzalem.
18 Hai ging t aigenste pad op as keunenks van Israël, krekt zo as t hoes van keunenk Achab dat dee. Hai haar ook ja ain van Achab as vraauw. Hai dee wat min is in ogen van de HEER.
19 Mor toch wol de HEER Juda nait verrinnewaaiern om zien knecht David. Dij haar e ja verzegd, dat hai t licht van zien keunenkshoes veur aaid branden loaten zol.
20 In zien tied kwammen Edomieten in opstand tegen Juda en stelden ze n aigen keunenk aan.
21 Joram trok dou mit aal zien striedwoagens op Saïr òf. Mor Edomieten sloten hom en aanvoerders van zien striedwoagens haildaal in. Dou dee e snaachts n oetvaal en kreeg Edomieten der onder, dat t leger ontkommen kon.
22 Toch muik Edom zok lös van Juda en dat is zo bleven aan dag van vandoag tou. Libna muik zok in aigenste tied ook lös van Juda.
23 Geschiedenis van Joram en wat e wieder doan het, staait aalmoal optaikend in kronieken van keunenks van Juda.
24 Dou Joram oet tied kwam, wer e begroaven bie zien veurolders in Davidsbörg. Zien zeun Achazja wer keunenk in zien stee.
25 In t twaalfde joar dat keunenk Joram, Achab zien zeun, over Israël regaaierde, wer Achazja, keunenk Joram van Juda zien zeun, keunenk over Juda.
26 Twijentwinneg joar was e, dou e keunenk wer. Hai regaaierde ain joar in Jeruzalem. Zien moeke was Atalja, n dochter van keunenk Omri van Israël.
27 Hai ging t aigenste pad op as t hoes van keunenk Achab en dee wat min is in ogen van de HEER, krekt as t hoes van keunenk Achab. Hai haar ook ja ain traauwd van Achab zien femilie.
28 Achazja ging mit keunenk Joram, Achab zien zeun, mit noar Ramot in Gilead om te vechten tegen keunenk Hazaël van Aram. Mor Arameeërs kregen Joram goud te pakken,
29 dat dij ging weerom noar Israël om wonden betern te loaten dij Arameeërs hom toubrocht haren dou e bie Ramot aan t vechten was tegen keunenk Hazaël van Aram. Achazja, Joram zien zeun, keunenk van Juda, ging noar Jizreël op veziede bie zaike keunenk Joram van Israël.
|
